Pergunta 3 atu Hanoin Hikas Molok Hili Parseiru Moris

Hili parseiru moris  mak buat ne'ebe importante mos hodi determina ita nia moris iha futuru. 

Wainhira ita hili parseiru moris, ita sei komete ho nia ba tempu naruk iha situasaun no kondisaun hotu. No husi ita nia hilin ne'e, konserteza ita hein katak bele hari'i relasaun permanente ne'ebe dura ba tempu naruk ho ema ne'ebe ita konsidera ona nudar ema ne'ebe propriu no  merese duni ita atu moris hamutuk hodi hasoru futuru. 

Maski nune'e hili parseiru la'os buat ne'ebe fasil atu halo no desidi hodi la tetu lai. Tan ne'e tuir mai nudar sita husi fonte Psychology Today, ita bele uza pergunta tolu tuir mai ne'e hodi husu ba ita nia an se parseiru ne'ebe atu hili ne'e loos ona nudar ema ne'ebe propriu ba ita nia moris. 

1. Ita bele sai belun ka lae?

Estudu balun relata katak kaben-nain ne’ebe konsege dura ba tempu naruk ho relasaun kaben ne’ebe haksolok fo sai sira nia segredu katak sira hola-malu la’os tan  de'it domin maibe mos tanba  sira bele sai belun ba malu. 

Tuir kazal ida naran Lydia (tinan75) hateten katak wainhira ita sei foinsa’e no forte karik ita nia sentimentu gosta ba malu fizikamente maka'as dadaun tuir ida-idak nia maneira. Maibe ne’e sei la sai buat ne’ebe importante liu tan  habelun mak sai hanesan buat ne’ebe importante liu atu  mantein ita nia relasaun iha tinan ba tinan. Ne’e tanba, durante ne’e,  hamutuk ita sei hasoru buat barak hanesan terus, susar, no dezafiu oioin nune’e ita presiza suporta husi ema seluk atu hakbiit ita. 

Tan ne’e, habelun malu ba. 

2. Ita gosta ita nia familia ida-idak ka lae?

Presiza kuinese no hare’e didiak ita nia futuru familia husi ita nia parseiru no oinsa ninia interaksaun ho sira. Husu fila-fali ba ita nia an se ita gosta sira ka lae tanba aban bairua ita sei hasoru bebeik sira. 

Tuir William kaben-nain ho tinan 86,  wainhira ema ida de’it husi familia parseiru mak la dun gosta ita karik la dun fo impaktu bo’ot ba ita nia relasaun iha futuru. Maibe wainhira ita nia futuru kuinadu/a eh banin feto/ sira mane la gosta  ita maibe ita ba nafatin, sira dalaruma sei kontinua tu’u ita pessoalmente exeptu ita ho parseiru forte atu hasoru situasaun ne’e. Maibe karik lae, relasaun ne’ebe la dun diak ne’e bele mos halo ita fahe malu/divorsiu, pressaun psikolojika iha kazamentu, ka lamenatsaun ne’ebe la koa’lia sai. 

Tamba ne'e, wainhira ita hola ita nia parseiru hanesan mos  ita hola nia familia tomak. Nune'e,  husu lai ita nia an rasik molok ita foti desizaun.

3. Ita bele koa'lia ba malu ka lae? 
Justin  kaben-nain tinan 85 hato’o katak kazamentu ne’ebe haksolok mak wainhira parseiru ida-idak bele nakloken  ba malu hodi koa’alia konaba buat hotu no la  tenki subar eh taka buat balun husi nia parseiru.
Wainhira senti buat ruma ne’ebe ladun diak, diak liu koa’lia sai duke nonook no husik liu de’it  hodi la ko'alia buat ida. Justin mos hato’o katak buat  ida ne’e  mak presiza atu ema aprende  hahu kedas  husi tempu namora.
Tamba nonok hela de’it karik dalaruma sai jeitu ne’ebe furak mos maibe sei la garante ba kazamentu ne’ebe hakslok.

Tan ne'e  tetu tiha lai molok atu hili. 

Adopta husi fonte Psychology Today.
https://www.psychologytoday.com/blog/lessons-loving/201412/3-questions-ask-yourself-you-commit?utm_source=FacebookPost&utm_medium=FBPost&utm_campaign=FBPost