Tátika 20 husi Péritu sira atu Hasoru Ema ne’ebe Difísil (Parte II Final)

Fonte: www.theexecutiveroundtable.ca

Iha parte dahuluk ita lee tiha ona tatika balun oinsa atu hasoru ema ne’ebe difisil. Hasoru ema difisil laos de’it presiza pasiensia maibe ita mos tenki foti aksaun atu hasoru sira iha ita nia relasaun no iha tempu ne’ebe ita presiza duni atu hetan mudansa ne’ebe pozitivu.

Tuir mai mak kontinuasaun ikus husi artigu dahuluk konaba tátika 20 atu hasoru ema difisil tuir versaun Psychology Today hanesan tuir mai ne’e;

1. Keta hasoru hirus ho hirus. Hasa’e lian, hatudu liman fuan, ka koalia ho la respeitu ba ema seluk sei hamanas tan de’it situasaun ne’ebe manas tiha ona. Uza lian ne’ebe mamar, kalma no monoton. Keta koko atu koa’lia liufali ema ne’e. Hein to’o ema ne’e dada iis netik lai mak koalia.
2. Keta haksesuk ka koko atu konvense ema ne’e ba buat ruma
3. Mantein espasu extra entre ita nia an no ema seluk ne’e. Ita nia instintu karik bele koko atu hakalma ema seluk liuhusi tau ita nia liman ba iha sira nia kaba’as, ka ho jestu seluk be hanesan ne’ebe bele apropriadu iha kontestu seluk. Maibe se ema seluk hirus tiha ona, keta book tan nia tanba ida ne’e bele kria misinterpretasaun ba ita nia hahalok.
4. Hateten ‘deskulpa’, ka, ‘ha’u koko atu hadia buat ne’e’. Ida ne'e bele hadia neneik fali situasaun barak maski lori tempu.
5. Halo limitasaun no haketan ita nia an. Maski tips hirak iha leten enkoraja ita atu rona no husik ema ne’ebe hirus fakar sai nia hirus, ita mos iha direitu atu sai asertivu (mantein ita nia an no konfiansa) hodi hateten ‘favor keta ko’alia mai ha’u hanesan ne’e’.
6. Fiar ita nia neon. Se ita nia neon dehan, ne’e sei maka’as liu fali,  nune’e ita presiza buka atu hela ho seguru nafatin. Buka estratejia hodi hasees an tiha.
7. Responde ida la to’o ba buat hotu. Ita tenki fleksivel nafatin. Maski matadalan hirak ne’e prova ona katak efetivu hodi hatuun situasaun nia manas, ema ida-idak ne’e uniku no bele responde ho diferente.
8. Buka tuir. Hafoin situasaun ne’e hotu ona, ko’alia netik ho ema ruma konaba buat ne’ebe akontese ona.
9. Husik mos ita nia estress rasik. Tanba ita tenki tahan ita nia an atu la responde ba situasaun aat ida la ho ita nia hakarak, nune’e agora ita bele hasai ita nia estress no naha hirak ne’e. Halai netik ka la’o halimar no keta husik emosaun sulan metin iha  ita nia isin.
10. Rekuinese ba ita nia an rasik katak ita hasoru ona situasaun ne’ebe la konfortavel. Wainhira ema ruma hatudu hahalok aat ba ita, sei halo ita tenki gasta enerjia atu la hatudu hahalok hanesan ema beik. Maski nune’e keta husik pasu ida ne’e tamba ita mos presiza buka atu mantein nafatin komportamentu ne’ebe diak.  

Fonte husi Psychology today.

https://www.psychologytoday.com/blog/living-the-questions/201503/20-expert-tactics-dealing-difficult-people

Buat 13 Ne’ebe Ema Mental Forte LA HALO (Parte 2 Final)

Fonte: Google pics

Loron diak belun sira...

Iha parte dahuluk Lia Murak ba Moris fo sai ona artigu ida ne’e nia parte dahuluk konaba buat 13 ne’ebe ema mental forte LA HALO. Tuir mai mak kontinuasaun ikus husi artigu refere no mai ta hare’e hamutuk konaba buat 7 seluk ne’ebe ema mental forte la halo tuir Amy Morin iha Psychology Today hanesan tuir mai ne'e: 

      7. Hela metin iha passadu

Hanoin no halo reflesaun fila fali ba ita nia pasadu hodi aprende husi pasadu ne’e rasik bele ajuda   duni ita  atu  harii mental ne’ebe forte, maibe hanoin barak liu ba pasadu mos sei hakanek ita.

Buka badamen ho ita nia pasadu hodi moris iha prezente no planu ba futuru. Maski ne’e  la’os buat ne’ebe fasil satan wainhira ita terus barak liu ona ho susar oioin, maibe ida-ne’e mak pasu nesesariu ida ba ita,  atu sai ita nia an ne’ebe di’ak liu. 

  

       8. Halo failansua ne’ebe hanesan ba bebeik

 Furak duni katak ita bele aprende natoon husi failansu ida-idak ne’ebe ita halo tiha ona no ita mos garante katak ita sei la repete tan failansu refere ba dala rua. Maibe iha realidade, dalaruma ita fasil  tebes atu repete fila-fali failansu ne’ebe hanesan. 

Aprende husi ita nia failansu husu  ita  nia haraik-an no hakarak duni atu buka estratejia foun atu sai diak liutan.

Ema mental forte la subar sira nia failansu ka fo dalan ba failansu sira ne’e atu akontese tan. Maibe sira hakfilak failansu sira ne’e ba oportunidade atu haburas sira nia an. 

       9. La gosta ho ema seluk nia susesu

Hare’e hetan ita nia kolega serbisu ruma simu promosaun ka rona kolega ida ko’alia konaba ninia atinjimentu bele dada ita nia laran-moras.  Maibe la gosta ema seluk nia susesu sei interfere deit ita nia abilidade atu atinji ita nia metas/golu sira. Wainhira ita bele asegura ita nia definisaun rasik konaba susesu, ita sei para laran-moras ba ema seluk atu atinji sira nia objektivu sira no ita sei komete duni atu atinji ita nia mehi sira.

 

10. Rende kedas hafoin failansu ruma.  

Sai buat ne’ebe normal atu sente moe, tauk, no lakon wainhira ita koko ba dala uluk no la la’o. Waihira ita sei kiik, ema sempre hanorin ita katak failansu ne’e buat aat ida, maibe sei la posivel atu susesu se ita nunka faila. 

Ema ho mental forte hare’e failansu nu’udar prova katak sira hakaas duni sira nia an ba limitasaun iha sira nia esforsu atu atinji sira nia potensial tomak. 

11. Tauk atu fo tempu mes-mesak ba an rasik.

Ohin loron, ho buat hotu ne’ebe la’o ho lais no ansi dalaruma halo ita susar atu hetan tempu hodi hakmatek netik. Ema barak evita silensiu ka mes-mesak tan hare’e katak wainhira laiha atividade sei halo ita senti la konfortavel.

Maibe tempu ba ita nia an rasik mak komponente esensial atu harii forsa ba ita nia mental. Ema mental forte kria oportunidade atu hela mes-mesak ho sira hanoin, reflete ba sira nia progresu, no kria sira nia metas/golo ba futuru.  

      12.   Senti katak mundu debe sira ba buat hotu

Fasil atu senti katak ita tenki hetan privilejiu. Maibe hein mundu ka ema seluk atu fo buat ne’ebe ita senti tenki fo ba ita,  sei la sai estratejia moris ne’ebe ajuda ita. Se ita okupadu hodi koko buat ne’ebe ita senti ita merese duni, ita sei laiha tempu atu foka ba buat ne’ebe ita tenki fo. Ema ida-idak iha prezente ne’ebe bele fahe hodi la hare’e ba justisa saida mak sira sei hetan iha sira nia moris.

13.  Hein atu hetan kedas rezultadu 

Furak duni karik ita bele hetan kedas buat hotu be ita hakarak hodi fekit liman dala ida de’it.

Ita dalaruma sai baruk wainhira ita tenki hein buat ruma ne’ebe lori tempu kleur, tamba ita nia kakutak hahu fiar katak buat hotu tenki lalais no iha kedas wainhira ita husu. 

Maibe ita nia kresimentu sei buras  ho pasu ne’ebe la’o neneik laos lalais kedan. Se ita hein liu rezultadu ruma atu mosu kedas iha tempu badak, ne’e sei halo ita deskontente . 

Ema mental forte hatene katak mudansa loloos presiza tempu no sira hakarak duni atu serbisu makaas hodi hare’e rezultadu hirak ne’e. 

Husi atetude hirak ne’e, presiza ita hotu atu hatene katak ema ida-idak iha kbiit atu harii mental ne’ebe forte. Maibe atu hala’o ida ne’e, ita presiza atu dezenvolve  hodi hatene tuir  ita nia hanoin, hahalok no sentimentu estraga an  ne’ebe sei hasees ita husi atinji ita nia metas/golo sira .

 

Fonte: Psychology Today

https://www.psychologytoday.com/blog/what-mentally-strong-people-dont-do/201501/13-things-mentally-strong-people-dont-do?utm_source=FacebookPost&utm_medium=FBPost&utm_campaign=FBPost